(१)

शिबु ढकाल

उम्किए ब्वाँसा एकदोटा झिँगा मारेर के गर्छौ
सक्दैनौ गर्न आजको काम टारेर के गर्छौ
घट्दैछ तिम्रो बोलीको मूल्य, बिक्दैन क्यै गरी
निर्लज्ज भयौ, आकाशका तारा झारेर के गर्छौ ?

(२)

अनायासै जीवन यात्रा मोडिन्छ भने
सहयात्रीबीच बाटोमै छोडिन्छ भने
किन खानु झुटा कसम साक्षी राखी राखी
पलभरमै वाचा बन्धन तोडिन्छ भने ।

(३)

ढल्कियो उमेर बदलियो मन रहेन जवानी
चाउरियो मुहार थलियो तन रहेन जवानी
दिएकै थिएँ साथ मैले तिम्रो सारथि बनेर
सक्दिनँ उठ्न के गरूँ भन रहेन जवानी ।

(४)

जति कोसिस गरे पनि तिम्रो मन धुन सकिनँ
ज्यानै सुम्पिए पनि तिम्रो आफ्नो हुन सकिनँ
एकान्तमै बगाउँछु भो यी अश्रुधारा
पोखेर आफैँलाई तिमीसामु रुन सकिनँ ।

(५)

हिँड सानू आज तिमीलाई डुलाउन लान्छु
मनका सारा पीर चिन्ता भुलाउन लान्छु
धेरै भयो व्यस्तताले तिमीलाई नहेरेको
दुई मुटुलाई एउटै झुला झुलाउन लान्छु।

पोखरा