पानीको आकारमा
अलिकति खरानीले जमाएको अहम्
यस्तै त हो आकार जिन्दगीको !

समयको नवीनतासँगै
बदलिरहने यसको आकार
कहिले लोभको भाँडोमा भरिएर पोखिने
कहिले क्रोधको तावामा उम्लिएर पोखिने
यत्ति त हो चमत्कार जिन्दगीको !

त्यसो त
प्रेमको अँगालोमा पनि
बिस्तारै बिस्तारै
सुक्दै गएको पानीसँगै
चाउरिँदै गएको खरानी
यस्तै त हो संसार जिन्दगीको !

उड्दै गरेको पानी
खस्दै गरेको खरानी
आँखाभरी
र पग्लदै गरेको मन
लिएर फर्कँदै गरेको मलामी
यही त हो व्यापार जिन्दगीको ।