हरेक दिन
घुमिरहेको छ म्याकबेथ
हाम्रै संसद्, मन्त्रालय र प्रशासकीय भवनहरूमा
दलको कार्यालय, बैठक र अधिवेशनहरूमा

जति पटक गिँडियोस् उसको टाउको
झन् झन् नयाँ अवतार लिएर तरबार बोकी आउँदै छ
ऊ हाम्रो गर्धन छिनाल्न

कहाँ गए हाम्रा जादुगर, धामी र झाँक्रीहरू
नयाँ राजाको पतनको भविष्यवाणी गर्न
अझै किन सकिरहेका छैनन् तिनले ?

सिंहासनमा निदाइरहे छ कृपण र कृतघ्न म्याकबेथ
र मानिसहरू
अझै उसको पाउ मोलिरहेछन् ।