साहित्यपोस्ट
नेपाली भाषा र साहित्यको सम्पूर्ण पत्रिका

वैशाख १६ मा लेखक दिवस मनाइने, विशिष्ट लेखकलाई एक लाख पुरस्कार दिइने

Chovar Blues Mobile Size

नेपाली लेखक सङ्घको शनिबार काठमाडौंमा बसेको बैठकले नेपाली साहित्यमा महत्त्वपूर्ण योगदान पुर्याउने एकजना स्रष्टालाई एकलाख राशि सहितको ‘विशिष्ट लेखक पुरस्कार’ प्रदान गर्ने निर्णय गरेको छ ।

नेपाली लेखक सङ्घका अध्यक्ष तथा वरिष्ठ कवि तीर्थ श्रेष्ठको अध्यक्षतामा बसेको सङ्घको दोस्रो केन्द्रीय समितिको पूर्ण बैठकले २०८० साल बैशाख १६ गतेदेखि ‘लेखक दिवस’ मनाउन शुरुआत गर्ने निर्णय गरेको छ । उक्त दिन नेपाली लेखक सङ्घका सबै प्रदेश कमिटी र जिल्ला शाखाहरूले ‘लेखक दिवस’ विशेष कार्यक्रमको आयोजना गरी मनाउन पनि आग्रह गरेको छ ।

१९८७ सालमा निरंकुश राणा शासनको विरुद्ध संगठित हुन सुरु गरिएको पुस्तकालय अभियानमा राज्यका तर्फबाट भएको ज्यादतीलाई ‘पुस्तकालय पर्व’का नामले परिचित छ । नेपालमा राजनीतिक दलहरू खोल्नुपूर्व नै सचेत जनस्तरबाट संगठित भएर निरंकुश शासकविरुद्ध यो नै सिर्जनात्मक चेतको पहिलो विद्रोह थियो । यस अभियानको क्रममा १९८७ वैशाख १६- १७ गते राज्यद्रोह गरेको नाममा पुस्तकालय अभियानमा संलग्न ४५ जना स्रष्टाहरूलाई राज्यका तर्फबाट विभिन्न मुद्दा लगाई, दण्ड जरिवाना र जेल चलान गरेको थियो। स्रष्टाहरूले राजनीतिक परिवर्तनका लागि चालेको संगठनात्मक चेतको उच्च स्मरण गर्दै उक्त ऎतिहासिक दिनलाई नेपाली लेखक सङ्घले ‘लेखक दिवस’ मनाउने निर्णय गरेको हो ।

सङ्घका उप-महासचिव श्रीबाबु कार्की उदासका अनुसार उक्त दिवसकै अवसर पारेर प्रदान गरिने विशिष्ट लेखक पुरस्कारको अक्षय-कोष स्थापना गर्न सङ्घले आफ्नो तर्फबाट रकम सङ्कलन गर्न शुरु गरेको हो । सो पुरस्कार प्रदान गर्न अक्षय-कोषका लागि कार्यसमितिको तर्फबाट मात्रै छ लाख बराबरको रकम सङ्कलन भएको छ ।

शुरुआतमै निकै उत्साहपूर्वक र स्वत:स्फुर्त रकम सङ्कलन भएको अक्षय-कोषमा आगामी दिनमा पनि रकम सङ्कलन हुने जनाइएको छ । विभिन्न शुभेच्छुक संघ / संस्था र व्यक्तिहरूबाट रकम सङ्कलन गरी कोषमा कम्तीमा २० लाख बराबरको मूलधन पुर्याउने संकल्प रहेको नेपाली लेखक सङ्घका अध्यक्ष तथा वरिष्ठ कवि तीर्थ श्रेष्ठले उद्घोष गर्नुभएको छ । उहाँका अनुसार यो पुरस्कार वितरण गर्न नेपाली लेखक सङ्घले एक कार्यविधि निर्माण गरी स्रष्टाहरूबाट स्रष्टाहरूको लागि प्रदान गरिएको रकमलाई व्यवस्थित गरिने समेत जनाउनु भएको छ ।

प्रतिक्रिया
Loading...