नवीन प्राचीन

१.

नवीन प्राचीन

एक दिन
एउटा मान्छेले
आफ्ना आँखा
आफैँलाई हेर्न प्रयोग गर्यो
बुद्ध भयो ।
हामीले हाम्रा आँखा बुद्ध हेर्न प्रयोग गर्यौँ र फूल चढायौँ ।

२.

एकदिन एउटा मान्छेले
बाटो, सत्य र जीवन ‘म’ नै हुँ’ भन्यो ।
हामीले ‘म’ लाई ‘तिमी’ बनाइदियौँ र
वर्षमा एक दिन बिदा थप्यौँ ।

३.

‘म’ भित्रको बुद्ध
डिप्रेसनको ओखती खल्तीमा बोकेर
बुद्धजयन्तीको शुभकामना बाँड्छ ।

४.

समृद्ध नगर बनाउँदा
‘अप्प दिपो भवः’ लेखिएको
लेउले छोपिएको थोत्रो स्तूपको भित्तो
भर्खरै नगरपालिकाको डम्पिङ ट्रकमा अज्ञात यात्रामा हिँड्यो ।