साहित्यपोस्ट
नेपाली भाषा र साहित्यको सम्पूर्ण पत्रिका

हावासँगै बग्ने बाध्यता

Chovar Blues Mobile Size
कुसुम गौतम

कस्ले भन्छ
टुक्रिएका बादलहरुमा
दुखाइ छैन भनेर!

उसको पनि आफ्नै दुखाइ हुन्छ
आफ्नो अस्तित्वका सुन्दर छविहरु मेटेर
बग्नु परेको छ हावासँगै

बादलको कथा र कविको व्यथामा
कुनै अन्तर छैन यहाँ
आमा भन्नु हुन्छ
“भो…बन्द गर्दे तेरा कलमहरु
कस्ले पढ्छ तेरा थोत्रा कविता”
इतिहास इतिहासमै सीमित भइगयो
वर्तमान आडम्बरमा हिँडिरहेको छ
आफ्नै इच्छा र आकाङ्क्षाहरुकै विशेषतामा
“त्यसैले बन्द गर्दे तेरा कलमहरु”

रगत पसिनाका छिटाहरुले
सिँचिएको हाम्रो वीरता
विक्टोरिया क्रसद्वारा सम्मानित
पूर्खाहरुका वीरता
पुस्तकबाट च्यातिएका पाना मात्र भइसके
आजकल अधिकार खोज्नेहरुकै भिड छ
कस्ले गराउँछ
कर्तव्य र दायित्त्वका बोध
वर्षौँदेखि मगजहरु कुहिरोभित्र गुम्सिएका छन्
अस्पष्ट क्षितिजको घेराभित्र
“त्यसैले बन्द गर्दे तेरा कलमहरु”
यहाँ कविको भन्दा गफीको भाउ छ
यहाँ साहित्य भन्दा सत्ताको खाँचो छ
बादलझैँ बाध्य छ कवि
यहाँको परिवेश र परिस्थितिमा बाँच्न
त्यसैले यहाँ बादलको कथा अनि
कविको व्यथामा
कुनै अन्तर छैन।

म्यान्मा

प्रतिक्रिया
Loading...