बाबुराम न्यौपाने “उत्स”

म !!
प्रकाशको अभिन्न अंश हुँ
ज्ञानचक्षुको पर्दा खुलेको पल
म जिउँदै
सङ्घर्षको भट्टीमा हुर्हुर्ती जलेर
चेतनकिरणका दिव्य तरङ्गहरूमा
निर्वस्त्र स्नान गर्नेछु ।
मेरो दृढतामुनि दबिएर
अन्धकारले गुहार माग्नेछ
ईश्वरको विराट्स्वरूप
मलाई अमरत्वको आशीर्वाद दिन
नयाँ अवतार लिनेछन्।
ईश्वरको मृत्यु र अस्तित्व
मानव चेतना र दर्शनको
सुदूर किनारसम्म
अन्त्यहिन तर्कको बिस्कुन लगाउँछ।
वेदका ऋचाहरूको मङ्गलध्वनि
र
बाइबल कुरान त्रिपिटकका
शान्ततरङ्गहरू
जीवनको लयमा
जबजब गायत्री राग बनेर उदाउनेछन्
मेरो अन्तस्करणबाट
चेतनाका नयाँ झिल्काहरू निस्कनेछन्
र
तिनै झिल्काको ज्वालामा जलेर
म ! हीरा भएर चम्कनेछु।
मन्दिर मस्जिद चर्च चैत्यका
मधुर गुञ्जनहरू
अतिवादको सूक्ष्म छिद्र छिचोलेर
जब
पुराण बाइबल कुरान त्रिपिटकका
अक्षरअक्षरमा
नव चेतनाको राँको झोस्छन्
तब म
युगको सँघारमा उभिएर
नयाँ सभ्यताको भव्य स्वागतमा
दीपावली गरिरहेको हुनेछु ।
दमक, झापा
लेखकका अन्य सिर्जनाहरू पढ्न यहाँ क्लिक गर्नुहोस्...