म अमेस्ट्रडाम शहरको गल्लीमा भौँतारिइरहेको छु,

रेडलाइट क्षेत्रको गल्लीहरूमा, निर्लज्ज !

म देह किनमेल गर्न आएको होइन,

उनीहरू वस्तु होइनन् , अनुहार हेरिरहेछु,

विवशता देख्छु उनीहरूका आँखामा ।

मलाई नियालिँदैछ, एक दुर्लभ वस्तुझैं,

तर म बिक्रीमा छैन ।

संसारले मलाई साट्न चाहन्छ, तौल्न चाहन्छ,

मलाई पगाल्न चाहन्छ,

तर मेरो इमानदारी कामुकतामा साटिँदैन,

पुष्ट नितम्ब अनि चौडा छातीमा पग्लिँदैन ।

आधुनिक सजावटहरूले चम्केको छ उनीहरूको शरीर, 

कामुक पहिरनले गल्लीको तापक्रम बढेको छ, 

मूल्यट्यागहरू बोल्छन्, गल्छन् धेरै मनहरू 

तर मेरो मौनता तिनका प्रस्तावभन्दा बढी अमूल्य छ ।

म त बजार पार गर्दैछु, बस् ।

न त बेच्न, न त किन्न,

म त एक यात्रु — सम्पूर्ण, स्वतन्त्र, विवाहित ।