सुनसरी । भोजपुर प्रतिभा प्रतिष्ठान वेलायतले आख्यानकार शरण राईलाई ‘भोजपुर प्रतिभा सम्मान’ तथा लोकगायक तेजेन्द्र गन्धर्वलाई ‘प्रतिभा पुरस्कार’ प्रदान गरेको छ ।

धरान–१८ बुद्धचोकस्थित कवि विमल गुरुङ स्मृति पुस्तकालयको सभाकक्षमा शुक्रबार आयोजित समारोहमा राईलाई नगद १५ हजार रुपैयाँसहित ताम्रपत्र र दोसल्ला प्रदान गरिएको थियो भने गन्धर्वलाई नगद ३५ हजार रुपैयाँसहित ताम्रपत्र र दोसल्लाले सम्मान गरिएको थियो ।
कार्यक्रममा अग्रज साहित्यकार बम देवान र प्रतिष्ठानका अध्यक्ष काङ्माङ नरेशले सम्मान तथा पुरस्कार हस्तान्तरण गर्नुभएकाे थियाे ।

शरण राईका आधा दर्जनभन्दा बढी आख्यान तथा लघुकथा सङ्ग्रह प्रकाशित छन् भने सारङ्गीवादक तेजेन्द्र गन्धर्वका तीन दर्जनभन्दा बढी लोकभाकाका गीत रेकर्ड भइसकेका छन् ।
प्रतिष्ठानले यसअघि पूर्णप्रकाश यात्री, परशु प्रधान, कृष्ण जोशी, जीवी लुगुन, शैलेन्द्र साकार, मन्जुल, गणेश रसिक, ज्ञानमणि नेपाल, श्याम तमोट तथा हिरण्य भोजपुरेलाई सम्मान गरिसकेको छ ।

त्यसैगरी श्रवण मुकारुङ, दिनेश वान्तवा, विप्लक ढकाल, विमल गिरी, मीरा राई, पूर्ण इन्फादा, भिषण मुकारुङ, कविता राई र करुणालाई प्रतिभा पुरस्कार प्रदान गरिसकेको जनाएको छ ।