लेखक तथा पत्रकार श्याम रिमालको नयाँ कविकृति हो ‘नदी बग्दैन’ । लेखकले पुस्तकमा समसामयिक तथा प्रगतिशील कविताहरू पस्किनुभएको छ ।

”कविता लेख्दैमा सबै कवि भएका छैनन्, अरुले मानिदिनुपर्छ । लेखिएका सबै साँच्चिकै कविता हुन्नन् पनि । कविले सुनाएका कवितामाथि सर्वसाधारणले ‘वाह वाह’ गरे वा ताली ठोके पनि बौद्धिक वर्गले त्यसमा कविताको गुण वा शक्ति नपाउन सक्छ ।’’, लेखक आफ्नो कुरामा लेख्नुहुन्छ, ”पद्यबाट नै कविता जगत्मा प्रवेश गरे पनि त्यसबाट पार लगाउन नसकेर रबर छन्दमा लागेको हुँ । कविताको सिद्धान्त पढेर लेखिएन । सरल लेख्न नै मन लाग्यो । अग्रजले हिँडेको बाटामा हिँडन कोशिश गरेको मात्र हो ।”

पुस्तकको भूमिकामा कवि श्यामल लेख्नुहुन्छ, ”नेपाली पत्रकारिताका कुनामा श्याम रिमाल फगत एक सम्पादकको नाम भएजस्तो देखिए पनि कविका रूपमा उनको परिचय पहिल्यै स्थापित भइसकेको हो । साहित्य त्यसमा पनि कविता भनेपछि हुरुक्कै हुने प्रौढ पुस्ताको प्रतिनिधि पात्र हुन् उनी ।’’

पुस्तकलाई नन्दऋषि न्यौपानेले प्रकाशन गर्नुभएको छ । २ सय २६ पृष्ठमा समेटिएको पुस्तकको मूल्य ३ सय ५० रुपैयाँ रहेको छ ।