साताकाे पुस्तककाे रूपमा साहित्यपोस्टलाई  उम्याग्दी जिल्लामा रहेर विविध विधामा कलम चलाउने शिव सस्मितको पाँचौँ कृति “कुरैकुराको खेती” प्राप्त भएको छ ।

१ सय २ पृष्ठमा फैलिएको यस पुस्तकमा ‘लाइन’, ‘बेर’, ‘झोला सम्मेलन’, ‘नगदनारन प्रभु’ , ‘दारीगन्थन’, ‘कुरैकुराको खेती’, ‘आलुगन्थन’, ‘चाप्लुस मास्टर’, ‘अदवत्रकारकी जय’, ‘कुर्चीशास्त्र’, ‘नातिबाजेका कुरा’, ‘नामै निक्लेन’ र ‘वाद’ गरी १३ थान हास्यव्यङ्ग्य निबन्ध संग्रहित छन् ।

कुरैकुराको खेती

“‘आलुगन्थनु’ – नेपालको ब्युरोक्रेसीमा हास्यव्यङ्ग्य छ । आलुलाई वस्तु बनाएर शिवले राजनीति, धर्म, दर्शन तथा इतिहासमा प्रकारान्तर प्रशस्त हास्यव्यङ्ग्य सिर्जना गरेका छन् । ‘चाप्लुस मास्टर’ – शिवका शब्दवाण अत्यन्त तीव्र छन् र लक्ष भेद गर्न सफल छन् । यहाँ संस्कृतको गुरु र नेपालीको शिक्षक शब्दलाई बाह्र हात पर उछिट्ट्याएर मास्टर शब्द आएको हो । हीनतालाई साधन बनाएर गुरु शब्दबाट हास्यव्यङ्ग्य सिर्जना गरेका छन् । मास्टरका प्रकार धेरै बनाएर हास्यव्यङ्ग्य सिर्जना गरेका छन् । चाप्लुस मास्टर आत्मारामहरूको दोहोलो काढ्छ । यस्ता एक्जाजरेसन पेस गरेर उक्ति वैचित्रयबाट हँसाउँछन् । यसमा शिक्षा र शिक्षकमा आएको विकृति र विसङ्गतिको अतिरञ्जना, परिहास, व्यङ्ग्य गरेर शिवले उछितो काढेका छन् ।” भूमिकामा होमनाथ सुवेदी उल्लेख गरेका छन्, “‘अलपत्रकारकी जय’ – यसमा शिवले पत्रकारहरूमा आएको पत्रकारिता र पीत पत्रकारिताको उछितो काढेका छन् । हास्यव्यङ्ग्य हो तर हास्यव्यङ्ग्य मात्र हैन यो यथार्थ पनि हो कि पत्रकारहरू नेताहरूलाई दोष लगाउँदा लगाउँदै आआफैँ पथभ्रष्ट भएर झूटो समाचार दिने सके नेताभन्दा पत्रकार नै महामना हो, राजनीतिभन्दा पत्रकारिता नै महामहा हो भनेर सीमा नाघ्नेहरूको हास्यव्यङ्ग्य गरेका छन् तर त्यो सबैमा नभए पनि धेरै पत्रकारमा यथार्थ हो जसमा सुधार हुनुपर्छ नभए ती दण्डित हुनुपर्छ । राज्यको चौथो अङ्ग हो भन्दै बेइमानी गरेर पैसा कमाउन कसैलाई छुट छैन । यो पनि यथार्थ हो ।”

आफ्नै कुरामा शिव सस्मित लेख्छन्, “कुरैकुराको खेती लेख्न उक्साउने, लेखेर कसैलाई देख्न उक्साउने यही समाजको परिवेश र देशकाल परिस्थिति र आफ्नै भोगाइ नै हुन् । सामाजिक, राजनीतिक, शैक्षिक आदि क्षेत्रका विकृति र विसङ्गति असह्य हुँदा मनको बाटो भएर कुराहरू मुखबाट हुरुरुरु निस्किएका मात्र हुन् र यहाँहरूसँग जिस्किएका मात्र हुन् ।”

पुस्तकलाई भुँडीपुराण प्रकाशनले बजारमा ल्याएको हो । यसको मूल्य २ सय ५० रुपियाँ रहेको छ ।