साताकाे पुस्तककाे रूपमा साहित्यपोस्टलाई लघुकथाकार कथाकार विश्व कुइकेलको पहिलो ऐतिहासिक उपन्यास “गोपीचा” प्राप्त भएको  छ ।

१ सय ३७ पृष्ठमा बुनिएको यस पुस्तकमा ‘ती माने पानी’, ‘तिलस्मी भेट’, ‘घर निकाला’, ‘खरिबोटको क्रूर दृश्य’, ‘अनि शिवजी बौलाए’ आदि २१ थान शीर्षक र परिशिष्ट समेत समावेश छन् ।

गाेपीचा

पुस्तकको पछिल्लो पृष्ठमा लेखिएको छ, “ ऐतिहासिक पात्र ‘गोपी शर्मा’ को कथा हो– ‘गोपीचा’ जसलाई गैरजातीय विवाह गरेकोमा जातिच्यूत गरी ‘च्यामे’ बनाएर जेल सजायसमेत तोकिएको थियो । भद्रगोल जेलमा रहँदा लौहपुरुष गणेशमान सिंहको योजनामा जेलब्रेक गरी भाग्ने योजनाको सहयात्रीसमेत बन्न पुगेको उसको कथामा ऊ असामान्य घटनाको सामान्य पात्र बनेको छ । राणाकालीन समाज, राजनीति, जाति व्यवस्था र विद्रोहजस्ता विषयलाई केन्द्रमा राखेर लेखिएको यो उपन्यास इतिहासलाई चियाउने आँखीझ्याल हो । उपन्यासले निर्माण गर्न खोजेको दृष्टिकोण, शैली–शिल्प र विषयवस्तुसमेतका आधारमा ’गोपीचा’ विशेष महत्त्व बोकेको दीर्घजीवी कृति हो ।”

भूमिकामा लेखक लेख्छन्, “केही पुस्तक र लेखहरूमा उठाइएका सामान्य प्रसङ्गको जगमा गोपी चरित्रको पुनर्निर्माणको लालसाले लेखिएको एक कथा हो । हालसम्म पुष्टि भएका तथ्यहरूलाई तोडमोड नगरी आख्यानीकरण गर्ने प्रयास यसमा गरिएको छ । गोपी च्यामेलाई आकार दिने यो प्रयासलाई अनुसन्धानबाट तथ्यपरक परीक्षण गरियो भने लेखनको अभीष्ट पूरा हुनेछ र लेखकले आफूलाई सफल ठान्नेछ ।”

शिखा बुक्सबाट प्रकाशित यस पुस्तकको मूल्य ३ सय ७५ रुपियाँ रहेको छ ।