यसै क्रममा ‘साताका पुस्तक’मा यो साता ४ पुस्तक । भरत पाैडेलकाे ‘याद’देखि डा. बुद्धि मल्लकाे ‘सफलता सम्भव छ’सम्म; पुस्तककाे छाेटाे परिचयसहित ।

० ० ०

१. पलक — लोकेन्द्र बञ्जारा

“पलक” गजलकार लोकेन्द्र बञ्जाराकृत तेस्रो गजल-कृति हो ।

यसमा ९१ वटा गजल सङ्ग्रहित छन् । पलकले नेपाली समाज बोलेको छ । गरिबीको कथा कहेको छ । विसङ्गत जीवनमा लय हालेको छ । पाठकलाई प्रभावित पार्ने गरी नै गजलहरू मार्मिक छन् ।

“यत्ति चैँ भनूँ कि ?”मा लोकेन्द्र बञ्जारा लेख्छन्, “म गजललाई असाध्यै प्रेम र स्नेह गर्न खोज्छु हृदयबाटै । त्यही एक कारण हो, न मैले कवि हुन बल गरेँ न आख्यानकार । गजल एक सिर्जना हुँदाहुँदै पनि यसले प्राविधिक पक्षमा पनि ध्यान पुर्याउनुपर्ने हुनाले धेरै ठाउँमा भाँती नपुगेको भने हुनसक्छ भन्ने चाहन्छ ।”

पुस्तकको आखिरी पृष्ठमा लेखिएको छ,

त्योमध्ये म पनि एक हुँ सम्झिराख्नू, नबिर्सिनू

सानो मान्छे, खुद्रा पैसा, अभर पर्दा काम लाग्छ ।

यसरी मैले पटक-पटक मेरा अनुहारहरू बेच्नुपर्यो

बाँच्न मै बलात्कृत लेखिएका अखबारहरू बेच्नुपर्यो ।

अनिवार्य बिर्सिनुपर्नेको सम्झन मुटुमा अझै रहेछ

मेरो त अर्को दुर्घटनाको संभावना मुटुमै अझै रहेछ ।

कुरै राख्न पाएन फँसीको सजाय पाएको व्यक्तिले,

पैसालाई न्यायको जिब्रो जफत गर्न सिकाइएको रैछ ।

पेज टर्नरबाट प्रकाशित ९२ पृष्ठमा फैलिएको पुस्तकको मूल्य ३ सय ५० रुपियाँ रहेको छ ।

= = =

२. आरु फुलेको साँझ — अनिल श्रेष्ठ

भाषा-साहित्य क्षेत्रमा सक्रिय रहँदै आएका कवि अनिल श्रेष्ठकृत कविता सङ्ग्रह हो — “आरु फुलेको साँझ” ।

तेस्रो संस्करण जनमत प्रकाशनले बजारमा ल्याएको हो । यसमा ‘के यी कविता तिम्रा आँखाजस्तै सुन्दर हुनेछैनन्’, ‘गाउँलाई सोध्याछ भन्दिनू है दाइ’, ‘तटबन्ध’, ‘लामखुट्टेको मुद्दा’, ‘नदी र गीत’लगायत ३७ थान कविता सङ्ग्रहित छन् ।

भूमिकामा रुद्र खरेल  लेख्छन्, “सेतो आतङ्कको मृत्यु-पीडालाई कवि अनिलले प्रकृतिका माध्यमबाट कति लोभलाग्दोसँग पस्किदिए । उनको कविताको गति, लय, संवेद्यता र विम्ब चयन हेर्दा, मलाई एउटा ठिटो भूपी जन्मन लागेको आभास हुन्छ, यद्यपि उसका आफ्नै युगसन्दर्भ र चटक्कै छुट्टिने विम्बहरू छन् ।”

भूमिकामा रोजेन्द्र सुवेदी लेख्छन्, “सत्यका परिधिमा वर्तमानलाई समेटेका प्रस्तुत सङ्ग्रहमा नेपाली समाजको बहुल यथार्थलाई सहज ढङ्गले प्रस्तुत गरेको देखिन्छ । नेपाली समाजका विश्वराजनीतिले अनपेक्षित ढङ्गले आत्मसात् गरेका पक्षलाई सिर्जनाको वस्तु बनाएका छन् अनिलले । यस सङ्ग्रहका कविताले वर्तमान शताब्दीमा रुग्ण बनेर बसेका ‘लाइ’परेका कीराहरू पहिल्याउन र टकटक्याउन प्रयत्न गरेका छन् । यस सङ्ग्रहका कविताले जाति, धर्म, संस्कृति, वर्ग, सत्ता र सामन्त् वर्गले जोगाइराखेका, सहज रूपमा पालेका ऐजेरुहरू विस्तारै धर्मराउन र खुस्काउन लागेका तथ्यहरू पनि आत्मसात् गरेका छन् ।”

१ सय ४३ पृष्ठमा बुनिएको पुस्तकको मूल्य ३ सय ५० रुपियाँ रहेको छ ।

= = =

३. सफलता सम्भव छ — डा. बुद्धि मल्ल

बैङ्कर डा. बुद्धि मल्लद्वारा लिखित पुस्तक हो — “सफलता सम्भव छ ।”

१ सय ८० पृष्ठभित्र ‘जिन्दगी सुन्दर छ’देखि लिएर ‘हट्ने होइन डटी लड्ने’, ‘टिमवर्क नै ड्रिमवर्क’, ‘आलोचकहरूबाट हतोत्साहित होइन, उत्साहित बनौँ’, ‘आफू खुसी हुन अरूलाई खुसी बनाउनोस्’सम्म जीवनपयोगी ४१ लेखहरू समेटिएका छन् ।

प्रकाशराज शर्मा लेख्छन्, “यस पुस्तकमा व्यवस्थापनका विभिन्न दृष्टिकोणहरूलाई एकदमै सरल तरिकाले प्रस्तुत गरिएको छ । मानिस सफल हुनका लागि धैर्यतादेखि महत्त्वकाङ्क्षासम्म र सोचदेखि खोजसम्मको विषयवस्तु समावेश गरी विविधता प्रदान गर्ने प्रयास गरिएको छ । यसबाट पाठकहरूले पढेर आनन्दका साथसाथै महत्त्वपूर्ण ज्ञान समेत हासिल गर्न सक्छन् । विभिन्न सफल व्यक्तिहरूका जीवनबाट झिकिएका सटीक शिक्षाले पुस्तक एकदमै प्रभावकारी छ ।”

पुस्तकका पछिललो पृष्ठमा उपेन्द्र पौड्याल लेख्छन्, “यस पुस्तकले आम मानिसमा आशा जगाउने प्रयास गरेको छ । आत्मविश्वासको कमीका कारण प्रयास नै नगर्नेहरूका लागि म गर्न सक्छु भन्ने भावना जागृत गराएको छ । जीवनमा सकारात्मक सोच राख्दै आफ्नो गन्तव्यमा अगाडि बढ्नुपर्छ भन्ने सन्देश दिएको छ । आफूलाई कमजोर ठान्नेहरूमा आत्मविश्वास जगाउने र आफूमा रहेका सम्भावनाहरूलाई पहिचान गर्दै गम्भिरतापूर्वक अगाडि बढ्न प्रेरणा दिएको छ । पुस्तक जीवनमा सफलताका निचोड तथा सुझावबाट समाजमा व्याप्त नकारात्मकता हटाउन सफल छ ।”

शिखा बुक्सबाट प्रकाशिट पुस्तकको मूल्य ४ सय ५० रुपियाँ रहेको छ ।

= = =

४. याद — भरत पौडेल

गजलकार तथा कवि भरत पौडेलकृत दोस्रो गजलसङ्ग्रह हो — “याद” ।

यसमा ९३ थान  गजल सङ्ग्रहित छन् । ‘याद’ले प्रेम फुलाउँछ । जिन्दगीको यथार्थ झल्काउँछ ।  पुस्तकभित्र कतै आश त कतै निराश । यसरी ‘याद’ले याद जन्माउँछ ।

पुस्तकको पछिल्लो कभर पृष्ठमा लेखिएको छ,

प्रयास सधैँ खास हुन्छ, अल्छी जिउँदो लास हुन्छ

…

उही पुग्छ मूलसम्म, जसको आँतमा प्यास हुन्छ

एकैछिनको पूर्णिमाले चन्द्रमाको दाग खुल्छ

नगर माग मिलनको, सामु हुँदा राज खुल्छ

…

फूलबाट काँडाहरू अलग पार्न जानेदेखि

जीवन कति सरल लाग्छ, मैले हार्न जानेदेखि

…

त्यहाँ आउने-जाने आदत धेरैको छ

सायद त्यो घरमा लागत धेरैको छ ।

पेज टर्नरबाट प्रकाशित ९४ पृष्ठमा फैलिएको पुस्तकको मूल्य २ सय २५ रुपियाँ रहेको छ ।