हो,
म सपना देख्ने मान्छे हुँ
उड्ने छन् मेरा सपनाका
रङ्गीन चङ्गाहरू
कहिले चञ्चल भएर
कहिले भावुक भएर
कहिले संसार जित्न हिँडेको
मोछाजस्तो भएर
त कहिले पिंजडाबाट
फुत्केर उडेको पक्षीजस्तो भएर
निरन्तर उडिरहने छन्

मेरा सपनाका
रङ्गीन चङ्गाहरू
थाहा छ मलाई
धर्ती मै खस्नु छ एक दिन
तर नीरप्रवाह
निसंकोच
उड्ने छन् सम्भावनाहरू
बोकेर
मेरा सपनाका रङ्गीन चङ्गाहरू
धेरै माथि उड्ने छन्
तर लक्ष्य भने आकाश
छुने छैन
कहिले आत्मविश्वासको
पुच्छर हालेर
त
कहिले साहसको प्वाँख हालेर
उडिरहने छन् रहरहरू साँचेर
मेरो सपनाका रङ्गीन चङ्गाहरू
बाध्यताको बतासले
छेक्न खोज्दा
मित्रताको हावा चल्दा
वज्रपातको वर्षातले
भिजाउन खोज्दा
धैर्यको चौतारी मिल्ला
थाहा छ मलाई
एक दिन च्यातिनेछु
चुँडिएर जमिनमै
खस्ने छु
खैर केही छैन
कहिले बलियो त
कहिले कमजोर
सम्बन्धका धागोहरूमा
गाँसिएर
फेरि उड्ने छन्
मेरा सपनाका
रङ्गीन चङ्गाहरू
नयाँ नयाँ रहर र
सपनाहरू बोकेर
निरन्तर उड्ने छन्
मेरो सपनाका
रङ्गीन चङ्गाहरू ।