सगरमाथाभन्दा अग्ला सपना
परेलीमा पोको पारेर
उर्ध्वगामी यात्रामा लम्केका पाइला
उसैका हुन्
आफूभित्रको तन्नेरी ऊर्जा
देशभक्तिमा घोलिएपछि
आफन्तजनको मायालाई
त्याग र समर्पणसँग साट्दै
मध्यरातको अँधेरोमा
सपनाको जुन टिप्न
सल्बलाएका हातहरु उसैका हुन्

देशलाई उसले आफ्नो रगत दियो
पत्नीलाई विधवा बनायो
छोराछोरीलाई टुहुरा बनायो
आमाबुबालाई सहाराविहीन तुल्यायो
र परिणाममा

परिवर्तनको बिहानी भित्र्यायो

ए देश हाँक्ने महारथीहरु हो
भनिदेऊ न लौ
उसको रगतले लिपेको भुईं टेकेर
यतिबेला तिमी
उसको पूजा गरिरहेका छौ
कि
अपमान ?

 

लेखकका अन्य सिर्जनाहरू पढ्न यहाँ क्लिक गर्नुहोस्...