शीतल छाया बन्छु भन्यौ, जलाएर गयौ ।
जिन्दगीलाई उराठ बगर बनाएर गयौ ।

बिदाइका हात हल्लाउँदै तिमी टाढा भयौ
हेर्दाहेर्दै यी नजरबाटै तिमी हराएर गयौ।

सँगै बाच्छु भन्यौ, तिमीसँगै मर्छु भन्थ्यौ
केवल सम्झना मात्र दिलमा सजाएर गयौ ।

तिमीसँग संसार भुल्दै सपनाहरू बुनिरहेँ
लत्याउँदै चोखो माया अन्तै रमाएर गयौ ।

तिमीलाई सम्झी नरोएको कुनै पल छैन
लत्याउँदै मायाको संसार रिसाएर गयौ ।

तिमीलाई खुसी देख्न रुन्न भन्छु तर पनि
हरेक पल आँसुको सागरमै डुबाएर गयौ ।