युगल बसेल

युगल बसेल (जन्म: वि.सं. २०२०, तुम्कोट, सन्धिखर्क–१, अर्घाखाँची) नेपाली साहित्यका कवि, निबन्धकार तथा हास्यव्यङ्ग्यकार हुनुहुन्छ । त्रिभुवन विश्वविद्यालयबाट शिक्षा सङ्कायमा स्नातकोत्तर उपाधि हासिल गर्नुभएका उहाँ नेपाल सरकारको निजामती सेवामा उपसचिव पदसम्म कार्यरत रही वि.सं. २०७८ मा अवकाश प्राप्त गर्नुभएको हो । साहित्यिक यात्रा वि.सं. २०४५ मा युगधारा साप्ताहिकमा प्रकाशित ‘आह्वान’ शीर्षकको कविताबाट प्रारम्भ गर्नुभएका उहाँको प्रकाशित कृतिमा हास्यव्यङ्ग्य निबन्धसङ्ग्रह छक्का (२०७०) प्रमुख रहेको छ । हास्यव्यङ्ग्य साहित्यप्रति विशेष अनुराग राख्ने उहाँले कविता, कथा र बालसाहित्यका क्षेत्रमा पनि निरन्तर कलम चलाउँदै आउनुभएको छ ।