मैले चुनाव हारेँ, हेर मैले चुनाव हारेँ !
लथालिङ्ग पारेँ पार्टी, लथालिङ्ग पारेँ ।
अक्कडिएँ, निमोठिएँ, मैले के बिराएँ ?
हुकुमी चलन चलाएँ, मैले के बिराएँ ?
मत घटाएँ, मत घटाएँ, रनभुल्ल पारेँ
मैले चुनाव हारेँ, हेर मैले चुनाव हारेँ !
लथालिङ्ग पारेँ पार्टी, लथालिङ्ग पारेँ ।
‘मै हुँ’ भन्ने ट्रम्प हार्थे, मोदी पनि हार्लान्
आज नाक फुलाउनेका ग्राफ तल झर्लान्
यही कल्पी अहम् त झन् कराँतिलो पारेँ
मैले चुनाव हारेँ, हेर मैले चुनाव हारेँ !
लथालिङ्ग पारेँ पार्टी, लथालिङ्ग पारेँ ।
झिँगाले सराप्दा कतै डिँगा मर्ने हैन
विरोधीले खुच्चिङ भनून्, सेखी झर्ने छैन
झोले हुललाई गुलामीमा मख्खै चख्खै पारेँ
मैले चुनाव हारेँ, हेर मैले चुनाव हारेँ !
लथालिङ्ग पारेँ पार्टी, लथालिङ्ग पारेँ ।
विपक्षीलाई रौँझैँ ठानेँ, मैले के बिगारेँ ?
मत बझाउने पाखा पारेँ, पाहाझैँ पछारेँ
आफैँ पनि पछारिएँ, सुद्धि नसुधारेँ
मैले चुनाव हारेँ, हेर मैले चुनाव हारेँ !
लथालिङ्ग पारेँ पार्टी, लथालिङ्ग पारेँ ।