काठमाडौँ / खेमराज पोखरेल एवं विश्वराज अधिकारीको संयुक्त लेखन रहेको यौन कथा सङ्ग्रह ‘सदृश्य पर्दा’ प्रकाशित भएको छ।

शिखा बुक्स, बागबजार, काठमाडौँले प्रकाशन गरेको यस सङ्ग्रहभित्र यौन कथाहरू समेटिएका छन्। यस सङ्ग्रहका कथाहरूले यौन दर्शन र यौन मनोविज्ञानका अन्तरवस्तुहरू केलाउन खोजेको कथकारद्वयले साहित्यपोस्टलाई बताउनुभयो ।

मानव जीवनमा अति महत्त्वपूर्ण रहेको यौन विषयका अनेक रोचक पक्षहरूलाई यस सङ्ग्रहमा समाविष्ट गरिएको छ । देश छाडेर विदेश पुगेका र देशभित्रैका पनि मोफसल अनि आञ्चलिक जीवनका रोचक यौनकथाहरू यो सङ्ग्रहले समेटेको उहाँहरूले बताउनुभयो ।

ज्ञान ज्योति बुक्स, काठमाडौँका साथै नेपालका विभिन्न पुस्तक पसलहरूमा यो पुस्तक उपलब्ध छ।