साहित्यपोस्ट सहकर्मी सुशीला राईको प्रेमगीत ‘सिकुरिमा’ प्रकाशनमा आउनेभएको छ । राईको शब्दमा किराती मिथकीय पात्र हेत्छाकुप्पा र सिकुरिमाको प्रेममा आधारित गीत प्रकाशनमा आउन लागेको हो ।

राईका अनुसार हेत्छाकुप्पा र सिकुरिमालाई किरात राईहरू आफ्नो पुर्खा मान्छन् । किरात राईहरू धेरै भाषी भएकाले आआफ्नो भाषामा हेत्छाकुप्पा र सिकुरिमालाई फरक फरक नामले पुकार्छन् ।

सुशीला राईको शब्द रहेको गीतमा सङ्गीत तथा सङ्गीत संयोजन आशकुमार राईको रहेको छ । मनमावी राई र कुमार प्रयास राईको आवाज रहेको गीतको रेकर्ड स्टुडियो किङमा सुरेश राईले गर्नुभएको हो ।

यस्ता छन् गीतका शब्दः

केटी : गाह्रो रै’छ हेत्छाकुप्पा माया डोरी फुकाउन ।

केटा : गाह्रै हुन्छ सिकुरिमा मनको माया लुकाउन ।

केटी: पत्थर थिएँ पगाल्यौ नि प्रेमको आगोले

       बगिराथेँ अल्झायौ नि माछी पालुङले ।

केटा : एक्लो थिएँ, एक्लै डुल्थेँ खोलाजङ्गलतिर

      सृष्टिसंयोग देखें तिमीलाई सुप्तुलुङनिर ।

केटी :  दायाहुईलुङ जस्तै न्यानो तिम्रो सामिप्यता

          कहिले आँशु कहिले हाँसो हाम्रो जीवनकथा ।

केटा : यो संसारै उज्यालो भो तिमीलाई भेटेपछि

     शुन्दरखिम बनेको हो हामी दुई मिलेपछि ।