बिर्सन खोज्छु तिमीलाई, मान्दैन यो मन।
तिमीबाहेक अरूलाई, छान्दैन यो मन।

जिन्दगी चोटहरू सँगालेर उनेको माला हो,
कसैलाई पनि धोका दिन, जान्दैन यो मन।

खुसी भएर बाँच्ने तिम्रा, रहरलाई सम्मान छ,
दोष अन्तै दिई वचनको तीर, हान्दैन यो मन।

हरेक पल विरहमा आफैँ, जलिरहेको हुन्छु,
लाखौँमा एक छौ, अरूसँग, दाँज्दैन यो मन।

भाग्यले तिम्रो हुन दिएन, कसैगरी यो जुनीमा
खुलस्त छ, निर्दोष छ, कसैले, बाँध्दैन यो मन।