साहित्यपोस्ट
नेपाली भाषा र साहित्यको सम्पूर्ण पत्रिका

बिजनेस बुक अफ दि इयर २०२२ को लामो सूची जारी

Chovar Blues Mobile Size


बेलायतबाट प्रकाशन हुने तथा संसारकै प्रख्यात पत्रिका फाइनान्सियल टाइम्स दैनिक पत्रिकाको संयोजनमा वितरण गरिने बिजनेस बुक अफ दि इयर २०२२ को लामो सूची जारी गरिएको छ । आज १६ अगस्तका दिन अखबारले आफ्नो सातौँ पृष्ठमा पूरा पृष्ठभरि विज्ञापन गर्दै लामो सूची जारी गरेको बताएको हो ।

सूचीमा १५ वटा पुस्तक छानिएका छन् । यीमध्येबाट ६ वटा अन्तिम तथा छोटो सूची जारी गरिनेछ । ती ६ मध्येबाट एउटालाई बिजनेस बुक अफ दि इयर २०२२ बाट सम्मानित गरिनेछ । छोटो सूचीलाई भने आउँदो सेप्टेम्बर २२ का दिन घोषणा गरिने अखबारले जनाएको छ ।

लामो सूचीमा परेका पुस्तकहरूमा केट बिङ्घाम र टिम हेम्सको द लङ सट रहेको छ । यस पुस्तकले कोभिड १९ को उपचारका लागि बेलायतमा भ्याक्सिन बनाउने दौड कस्तो थियो, यसमा कुन कुन कम्पनी लागिपरेका थिए र त्यसको परिणाम कस्तो रह्यो भन्नेबारे मिहिन रूपमा केलाइएको छ ।

यस्तै बटलर टु द वर्ल्ड पुस्तकमा धनकुबेरहरू, कर छल्नेहरू, अपराधी तथा भ्रष्ट राजनीतिज्ञहरूका लागि बेलायत कसरी नोकर बनिरहेको छ भन्नेबारे ओलिभर बुलोफको पुस्तकले बताएको छ ।

यसैगरी म्याथ्यु क्याम्पबेल र किट चेलेलले लेखेको डेड इन द वाटर पुस्तकले संसारकै सबैभन्दा गुप्त उद्योगमा चलिरहेको हत्या र ठगीका बारेमा उजागर गरेको छ ।

यस्तै ब्याजदरको वास्तविक कथामाथि इडवार्ड चान्सलरले लेखेको द प्राइस अफ टाइम पनि सूचीमा परेको छ ।

sagarmani mobile size

लुलु चेनले लेखेको चीनको प्रख्यात प्रविधि कम्पनी टान्सेन्ट र चीनको प्रविधिमाथिको महत्त्वाकांक्षाको पुस्तक इन्फ्लुएन्स एम्पायर सूचीमा राखिएको छ ।

टाइलर कोवेन र ड्यानियल ग्रसले लेखेको ट्यालेन्टः हाउ टु आइडेन्टीफाई इनर्जाइजर्स, क्रिएटिभ्स, एन्ड विनर्स अराउन्ड द वर्ल्ड, विलियम डि. कोहनले लेखेको अमेरिकाको प्रख्यात कम्पनी जेनरल इलेक्ट्रिकको उत्थान र पतनको कथा पावर फेलर पनि सूचीमा परेका छन् ।

अर्को एउटा रोचक पुस्तक पनि सूचीमा परेको छ । जे. ब्राडफोर्ड डिलङद्वारा लिखित बीसौँ शताब्दीको आर्थिक इतिहास स्लाउचिङ टुवार्ड्स युटोपिया, क्याथरिन जजलिखित डाइरेक्टः द राइज अफ द मिडलम्यान इकोनमी एन्ड द पावर अफ गोइङ टु द सोर्स यो सूचीमा अटाएको छ ।

गेरी गर्स्टलद्वारा लिखित द राइज एन्ड फल अफ द नियोलिबरल अर्डरः अमेरिका एन्ड द वर्ल्ड इन द फ्रि मार्केट एरा, सेबास्टियन मालाबाईद्वारा लिखित द पावर लः भेन्चर क्यापिटल एन्ड द आर्ट अफ डिसरप्सन पनि यो सूचीमा छन् ।

क्रिस मिलरको चिप वारः द फाइट फर द वर्ल्ड्स मोस्ट क्रिटिकल टेक्नोलजी, पिटर रोबिन्सनको फ्लाइङ ब्लाइन्डः द ७३७ म्याक्स ट्राजेडी एन्ड द फल अफ बोइङ, हेलेन थम्पसनको डिसअर्डरः हार्ड टाइम्स इन द ट्वेन्टीफस्ट सेन्चुरी पनि सूचीमा परेका छन् । गेइया भिन्सको नोम्याड सेन्चुरीः हाउ टु सरभाइभ द क्लाइमेट अपहिभल पनि सूचीमा छ ।

यो सूचीबाट छानिएका ६ मध्येबाट ५ डिसेम्बरमा विजेता घोषित गरिनेछ । विजेता पुस्तकले ३० हजार स्टर्लिङ पाउन्ड रकम पाउने छ भने छोटो सूचीको छनोटमा परेका प्रत्येक पुस्तकले १० हजार पाउण्ड प्राप्त गर्नेछन् ।

प्रतिक्रिया
Loading...