साहित्यपोस्ट इ पत्रिकाको अफ्रिका संयोजक गणेश खड्का २०३३ साल माघ १६ मा नेपालको भोजपुर जिल्लास्थित तिवारी भञ्ज्याङ ४ मा मीना तथा मीनबहादुर खड्का कोखबाट जन्मनु भएको हो । गणेश खड्का हाल स्थायी रूपमा सुनसरी जिल्लाको इटहरी ४ मा बसोबास गर्नुहुन्छ । उहाँ हाल वैदेशिक रोजगारीको सिलसिलामा सेलेल्सस्थित फ्रिगेट आइल्यान्डमा हुनुहुन्छ ।

धनकुटा बहुमुखी क्याम्पसबाट स्नातकसम्म अध्ययन गर्नुभएका खड्काले प्रथम पटक २०४९ सालमा कविता लेखी साहित्यमा प्रवेश गर्नु भएको थियो । उहाँले नाटक, कविता, गीत, गजल तथा समसामयिक लेख लेख्नु भएका छन् ।

उहाँका थिएटर र आँखाहरू (नाटक संग्रह २०७०), हिउँले आगो पगालेर (कविता संग्रह २०७१) प्रकाशन गरिसक्नु भएको छ । उहाँका संयुक्त साहित्य संग्रहका रूपमा बिम्ब र मितेरी प्रकाशन गर्नु भएको छ । उहाँले नाटक लेखन, निर्देशन, अभिनय लगायतका कार्य पनि गर्नु भएको छ । रोचक त उहाँले नेपाल प्रज्ञा प्रतिष्ठानद्वारा आयोजित राष्ट्रिय नाटक महोत्सव तथा क्षेत्रीय नाटक महोत्सवमा सहभागितासमेत जनाइसक्नु भएको छ । उहाँले रेडियो नेपाल क्षेत्रीय प्रसारण केन्द्र धनकुटामा २०५४ देखि २०५६ सम्म सेवासमेत गर्नु भएकोछ ।

उहाँ पुष्पाञ्जली सांस्कृतिक परिवार भोजपुरको संस्थापक अध्यक्ष हुनुहुन्छ । त्यस्तै नवकलाकार सांस्कृतिक समुदाय धनकुटाको आजीवन सदस्य हुनुहुन्छ । मातृभूमि रंगमञ्च भोजपुरका संस्थापक सचिवसँगै उहाँ प्रवासी नेपाली साहित्यिक मञ्च मलेसियाको सल्लाहकार, अन्तराष्ट्रिय नेपालि साहित्य समाज मलेसिया च्याप्टरको सल्लाहकारसमेत हुनुहुन्छ ।

उहाँले अन्तरविद्यालय कविता प्रतियोगिता २०४९ मा प्रथम पुरस्कार जित्नु भएको थियो भने द रेयुकाइ नेपाल धनुकटा शाखाद्वाार आयोजित कविता प्रतियोगिता २०५२ मा दोस्रो पुरस्कार हात पार्नु भएको थियो । हुसाडेक धनकुटाद्वारा आयोजित कविता प्रतियोगिता २०५२ मा प्रथम पुरस्कार हात पार्नु भएको थियो ।
यसैगरी नेपाली साहित्य प्रतिष्ठान उत्तर अमेरिकाद्वारा आयोजित तेस्रो अन्तर्राष्ट्रिय नेपाली कविता महोत्सव २०१२ मा प्रथम हुनुभएको थियो भने अनेसासद्वारा राष्ट्रकवि माधव घिमिरेको जन्मजयन्तीको अवसरमा आयोजित पहिलो अनेसास कविता महोत्सव २०२१ मा तृतीय स्थान हासिल गर्नु भएको थियो ।