तिम्रो बाजे पुस्ताले गरेको
राणा शासन विरोधी क्रान्ति
र
मेरा बाजे पुस्ताले गरेको
राणा शासन विरोधी क्रान्ति एकै थियो
प्रजातन्त्र आएपछि
तिम्रा बाजे मानपदवी र तक्पाले सम्मानित भए

प्रधान पञ्च
अञ्चलाधीश
राज परिवारको सदस्य
बने
मेरा बाजे उपचार नपाएर बिते

********

तिम्रो बा पुस्ताले लडेको
पञ्चायत शासन विरोधी जनआन्दोलन
र
मेरा बा पुस्ताले लडेको
पञ्चायत शासन विरोधी जनआन्दोलन
एकै थियो
बहुदलीय व्यवस्था आएपछि
तिम्रा बा धेरै पटक देशको नेतृत्वमा पुगे

मेरा बाले
शरीरभरि गोलीका छर्रा बोकेर बाँच्नु पर्यो

********

तिमीले लडेको राजतन्त्र विरोधी
जनयुद्ध
र
मैले लडेको राजतन्त्रविरोधी जनयुद्ध एकै थियो
तिमी पटक पटक
सांसद
मन्त्री
भएर
सिंह दरबार पुगिसक्यौ
म अझै सडकमा
समावेशिताको नारा लगाउँदै छु
त्यसैले यो देश कसको हो ?
तिम्रो हो कि
मेरो हो ?

सुदूरपश्चिम प्रदेश