खोटाङ जिल्लाको सदरमुकाम दिक्तेल बजारमा आयोजित ‘तेस्रो बृहत् खोटाङ–हलेसी खेलकुद, साहित्यिक तथा पर्यटन महोत्सव–२०८३’ सम्पन्न भएको छ । नेपाल खेलकुद प्रतिष्ठान खोटाङ र नेपाल सितोरियो कराते सङ्घ खोटाङको संयुक्त आयोजनामा छ दिनसम्म सञ्चालन भएको महोत्सव विविध कार्यक्रमसहित समापन गरिएको हो ।
समापन समारोहमा विभिन्न क्षेत्रमा योगदान पुर्याउनुभएकाे पाँच व्यक्तित्वलाई जनही नगद रु ११ हजार १ सय ११, दोसल्ला र कदरपत्रसहित सम्मान गरिएको छ । साहित्यतर्फ रविमान लम्जेल, शिक्षातर्फ हेम नाछिरिङ, खेलकुदतर्फ प्रभुराम राई, सामाजिक क्षेत्रमा दिनेश घिमिरे तथा पत्रकारितातर्फ सविना अछामे परियारलाई सम्मान गरिएको आयोजकले जनाएको छ ।
महोत्सवको अन्तिम दिन साहित्यिक कार्यक्रम आयोजना गरिएको थियो । कार्यक्रममा कवि मनु मञ्जिल, कमल सङ्घर्ष, बबिता भुजेल, कविता राई, रजत किराती, इन्द्र नारथुङ्गे, कोपिता राईलगायत करिब ४० जना साहित्यकारले आ–आफ्ना सिर्जना वाचन गर्नुभएकाे थियाे ।
आयोजक नेपाल खेलकुद प्रतिष्ठानका अध्यक्ष सञ्जयकुमार राईका अनुसार खेलकुद र साहित्यको माध्यमबाट खोटाङलाई राष्ट्रिय तथा अन्तर्राष्ट्रिय स्तरमा परिचित गराउँदै पर्यटन प्रवर्द्धन गर्ने उद्देश्यले महोत्सव आयोजना गरिएको हो । छ दिनसम्म सञ्चालन भएको महोत्सवले जिल्लाको पर्यटन र व्यापार–व्यवसाय प्रवर्द्धनमा सकारात्मक प्रभाव पारेको आयोजकको दाबी छ ।
जिल्ला समन्वय समिति खोटाङका प्रमुख सनबहादुर राईको संयोजकत्वमा मूल आयोजक समिति गठन गरी सञ्चालन गरिएको महोत्सव सम्पन्न गर्न करिब ३० लाख रुपैयाँभन्दा बढी खर्च भएको जनाइएको छ ।