काठमाडौं । लीलाध्वज थापा साहित्य प्रतिष्ठानले अग्रज साहित्यिक पत्रकार तथा साहित्यकार रोचक घिमिरेलाई ‘लीलाध्वज थापा साहित्य सम्मान’ समर्पण गरेको छ ।
साहित्यकार लीलाध्वज थापाको १०६औँ जन्मजयन्तीका अवसरमा आयोजित कार्यक्रममा प्रमुख अतिथि प्रा.डा. जयराज आचार्यले घिमिरेलाई सम्मानपत्रसहित २५ हजार रुपैयाँ नगद प्रदान गर्नुभएको हो ।
प्रा.डा. आचार्यले साहित्यिक साधनामा छ दशकभन्दा बढी समयदेखि सक्रिय घिमिरेलाई सम्मान गर्न पाउनु गौरवको विषय भएको बताउनुभयो । उहाँले आदिकवि भानुभक्त आचार्य र कविशिरोमणि लेखनाथ पौड्यालका साहित्यिक विशेषताबारे पनि चर्चा गर्नुभयो ।
कवि डा. देवी नेपालले स्वर्गीय लीलाध्वज थापाको साहित्यिक योगदानमाथि प्रकाश पार्नुभयो ।
सम्मानित घिमिरेले उपन्यास र नाटकबाट साहित्यिक क्षेत्रमा प्रवेश गर्नुभएका लीलाध्वज थापा यशस्वी साहित्यकार रहेको उल्लेख गर्नुभयो । उहाँले नाट्यशिरोमणि बालकृष्ण समसँग थापाको सहकार्यबारे पनि स्मरण गर्नुभयो ।
आफूलाई योग्य ठानेर सम्मान प्रदान गरेकोमा घिमिरेले प्रतिष्ठानप्रति कृतज्ञता व्यक्त गर्नुभयो ।