पत्रकार तथा लेखक विनोदबाबु रिजालको दोस्रो कृति ‘नैबेद’ कथासङ्ग्रह सार्वजनिक भएको छ ।
यसअघि लकडाउन डायरी ‘एकान्तबास’ प्रकाशित गरिसक्नुभएका रिजालको नयाँ कृति शिखा बुक्सले प्रकाशन गरेको हो । अक्षर समूह चितवनले आइतबार भरतपुरमा आयोजना गरेको कार्यक्रममा कृतिको लोकार्पण गरिएको थियो ।
लेखकका बुवाआमा तथा छोराछोरी, कवि भूपिन, एक्सपर्ट चितवनका प्रबन्धक नरहरि पौडेल ‘किरण’ र अक्षर समूह चितवनका अध्यक्ष लेखराम सापकोटाले संयुक्त रूपमा कृति विमोचन गर्नुभएको थियो ।
विमोचनपछि कवि भूपिनले ‘नैबेद’ समकालीन नेपाली समाजका विविध सङ्कट र यथार्थलाई केन्द्रमा राखिएको सशक्त कथासङ्ग्रह भएको बताउनुभयो । सङ्ग्रहका कथाले मनोरञ्जनभन्दा बढी पाठकलाई विचार, प्रश्न र आत्ममन्थनतर्फ डोर्याउने उहाँको धारणा थियो ।
कथासङ्ग्रहमा विज्ञान, शिक्षा, अन्धविश्वास, वैदेशिक रोजगारी, प्रेम, राजनीति, अपराध, महामारी र मनोविज्ञानजस्ता विषय समेटिएको बताइएको छ । यी कथामार्फत समकालीन नेपाली समाजको मानसिक, सामाजिक र सांस्कृतिक सङ्क्रमणलाई कलात्मक रूपमा अभिव्यक्त गरिएको समीक्षक भूपिनले उल्लेख गर्नुभयो ।
कार्यक्रममा अक्षर समूह चितवनका अध्यक्ष लेखराम सापकोटाले लेखक रिजालसँग कृतिको लेखन प्रक्रिया, कथाको संरचना तथा साहित्यिक रुचिका विषयमा संवाद गर्नुभएको थियो । अक्षर समूहका पूर्वअध्यक्ष रमेश प्रभातले स्वागत तथा कार्यक्रम सहजीकरण गर्नुभएको थियो ।
शिखा बुक्सबाट प्रकाशित ‘नैबेद’मा १४ कथा समेटिएका छन् । पुस्तकको मूल्य ५ सय ९५ रुपैयाँ रहेको छ ।