पोखरा । माधव वियोगी वाङ्मय प्रतिष्ठान, नेपालले २०८२ सालका लागि विभिन्न तीनवटा पुरस्कार तथा सम्मान घोषणा गरेको छ । प्रतिष्ठानको बुधबार बसेको बैठकले उक्त निर्णय गरेको हो ।
आगामी वैशाख ८ गते मनाइने छन्द दिवसका अवसरमा प्रदान गरिने ती पुरस्कारमध्ये ‘अग्निविष्णु छन्दसाधना पुरस्कार’ तनहुँ, देवघाट निवासी कवि कृष्णशरण उपाध्यायलाई प्रदान गरिने भएको छ । लामो समयदेखि छन्दोबद्ध कविता सिर्जना गर्दै आउनुभएकाे तथा द्रुतकाव्य सर्जकका रूपमा परिचित उपाध्यायलाई उक्त पुरस्कार प्रदान गर्न लागिएको हो । यो पुरस्कार प्रतिष्ठानका संस्थानायक माधव वियोगीका मातापिता विष्णुमाया र अग्निधर घिमिरेको नाममा स्थापना गरिएको हो । यसअघि उक्त पुरस्कार झापाका भानुभक्त कुभिण्डेलीले प्राप्त गर्नुभएकाे थियाे ।
त्यसैगरी ‘छन्द बचाऊँ वाचनकला पुरस्कार’ काठमाडौं निवासी कवि दिनेश पाण्डेलाई प्रदान गर्ने निर्णय गरिएको छ । कविता वाचनमा नवीन शैलीको प्रयोग गर्दै छन्दकविताको स्तरोन्नतिमा योगदान पुर्याएको भन्दै उहाँलाई यो सम्मान प्रदान गर्न लागिएको हो । यसअघि यो पुरस्कार कास्कीका शिव त्रिपाठी र बाराकी सरु बस्नेतले प्राप्त गरिसक्नुभएकाे छ ।
यसैक्रममा छन्द कविता लेखन र वाचनमा सक्रिय योगदान पुर्याउँदै आउनुभएकाे तनहुँकाे कवि वसुन्धरा पौडेललाई ‘माधव वियोगी सम्मान’ प्रदान गरिने निर्णय गरिएको प्रतिष्ठानले जनाएको छ ।
प्रतिष्ठानका उपाध्यक्ष तथा काव्यकार छन्दमणि त्रिपाठीका अनुसार उक्त पुरस्कार तथा सम्मानहरू छन्द दिवसको अवसर पारेर औपचारिक रूपमा वितरण गरिनेछ ।