“ड्याम्म…” रातको बेला एक्कासि पड्कियो ।
टोलछिमेक भय मिश्रित कौतुहलतासहित घर बाहिर निस्किए ।
“बचाओ, बचाओ ।” अलि परबाट आवाज आएको सुनियो ।
सबै त्यतैतिर दौडिए ।
ऊ सडकछेउ ढलेको थियो । भलभल रगत बग्दै थियो ।
एम्बुलेन्स बोलाएर हत्तपत्त अस्पताल पुर्याए ।
जाँचबुझपछि डाक्टरले उसलाई मृत घोषणा गरे ।
“कसरी भयो ? कसले गर्यो ? किन गर्यो ?” सबैको मुखबाट यस्तै प्रश्न जन्मन थाले ।
उत्तर कसैसँग थिएन ।
प्रहरीले घटनास्थल छेका हाल्यो । मुचुल्का तयार गर्यो ।
समाजमा एक किसिमको भयावह वातावरणको सृजना भयो ।
प्रहरीले सूक्ष्म अनुसन्धान थाल्यो । टोलमा प्रहरी उपस्थिति बाक्लियो । अनुसन्धानका लागि कुकुर समेत टोलमा घुमाइयो ।
कहीँ कतै सुराकी पत्ता लागेन ।
जनमानसमा आक्रोश बढ्न थाल्यो । पुलिस प्रशासनले अनुसन्धानमा ढिलाइ गरेको भन्दै नाराजुलुस निस्कियो ।
मिलेमतोमा हत्यारा लुकाएको भन्ने स्वर समेत सुनिन थाल्यो ।
यस्तैमा एकदिन प्रहरीले पत्रकार सम्मेलन गरि हत्यामा संलग्नलाई सार्वजनिक गर्यो ।
“सँगै लोकसेवाको परीक्षा दिएका साथीमध्ये उसको नाम निस्किएर कार्यरत थियो । उसको हत्या गरि नियुक्ति पाउने उद्देश्यले वैकल्पिक उम्मेदवारले गोली हानेर हत्या गरेको” भन्ने प्रहरीले खुलासा गर्यो ।