आजकाल बढेको मोबाइलको “रिङटोन” ले
सूचना र जानकारीसँगै व्यस्तता बढाइरहेछ ।
समन्वयका पानामा हार्दिकताका हरफ बढाउँदै जाँदा
छिमेकमा लागेको आगोले चिन्ता थपिरहेछ ।
आशङ्काले जन्माएको कम्पनसँगै,
आक्रोशको ज्वारभाटा थाम्नुछ यहाँ।
सडकमा निस्केको मशालभन्दा धेरै
सामाजिक सञ्जालको आगो निभाउनुछ जहाँ ।
मन्दिरको घण्टी र मस्जिदको अजान
दुवैको अस्तित्व जोगाउनुछ यहाँ ।
मतदाता र मतपेटिकाको मात्रै होइन
आफ्नै विश्वासको रक्षा गर्नुछ जहाँ ।
हामी सचेत छौँ
कतै एउटा अफवाहले सहरको शान्ति नखोसियोस् !
धार्मिक-सांस्कृतिक सद्भाव तोड्न
प्रतिशोधको आगो नझोसियोस् !!
हामी प्रतिबद्ध छौँ
सेवाले भरिएको हाम्रो मस्तिष्कलाई
तन-मनले कहिल्यै थाक्न दिँदैनौँ ।
देश र जनताको शान्तिको अभिलाषा
कसैले चाहँदैमा रोक्न दिँदैनौँ ।
हामी बुझ्दछौँ
नागरिकको मौन अपेक्षा
हाम्रो साथमा छ सहकर्मीको अटल भरोसा ।
चिर्दै जानेछौँ सबै प्रतिकूलता
किनकि, कर्तव्य नै हो हाम्रो जिजीविषा ।
हामी ठान्दछौँ
राष्ट्र र राष्ट्रियता सधैँ
हामीभन्दा धेरै माथि छन् ।
सार्वजनिक शान्तिका लागि हाम्रा कर्म
इतिहासमा सधैँ साक्षी छन् ।