प्रेम-१
तिमीलाई मैले समय दिएँ
सँगै हुँदा बताएँ
तिमीसँग आकर्षित हुनाका कारणहरू।
भेटका हरेक क्षणहरू रङ्गीन
र प्रेमिल त हुनैपर्छ
सम्झनाहरू नै त हुन्
सबैका लागि
एकान्तका कोसेली ।
प्रेम-२
अग्नि-वर्षा भइरहेछ
हिमआँधी र ग्लेसियरले ढाकिरहेछ
युद्ध-मैदानमा झैँ
आक्रमणको तयारी भइरहेछ
भूकम्पले हल्लाइरहेछ सारा संसार ।
हामी दुई भने एक-अर्काको
मायाको यानमा
सयर गर्दैछौँ निस्फिक्री।
अग्निस्नान गर्दैछौँ
तर यो जति खुसी
जिन्दगीमा अरू छैन ।
प्रेम-३
विशाल अग्निकुण्डमा
तिमी र म पसेका छौँ
जलिरहेछौँ दुवै सर्वोच्च आनन्दमा ।
निस्कँदा दुवै मिलेर
एक हुनु छ हामीलाई ।
प्रेम-४
कानेखुसी खुबै चलिरहेछ
आँधी खुबै चलिरहेछ
बीचमा सुन्दर बगैँचा छ
बिना अवरोध बगैँचा हुर्किइरहेछ ।
प्रेम-५
घोर अन्धकार नाघेर आएँ
डराइनँ
अग्ला पहाडहरू नाघेर आएँ
थाकिनँ
धेरै बोतलहरू रित्याएँ
मातिनँ ।
जब भेटेँ तिमीलाई
शून्य-शून्य बनिरहेछु
करोडौँ तिर्खा बटुलेर
विशाल समुद्र रित्याइरहेछु ।