छिमेकीका पैतालाले
सार्वभौम देशको सिमाना
कुल्चँदा
वर्दीधारीले हतियार
बोकेर
आफ्नै भूमिमा परेड
खेल्दा
देखेनछ राज्यले
देखेछन् स्वयम्भूका
चक्षुले
सम्झेछन् जनताले
नालापानी र कुमाउमा जस्तै
मिचाहालाई खुकुरीले
खेदेको ।
सिमानाको रेखा त
छिमेकीको भावनामा
कोरिनुपर्छ
कानुनको विधिमा
बाँधिएको हुनुपर्छ ।
भूगोल केवल जमिनको
टुक्रा मात्र होइन
स्वाभिमानी देशको अस्तित्व हो
जसको रक्षाका लागि
हरेक नागरिक उठ्नु
पर्छ
एकतामा जुट्नु पर्छ ।
कागजका नक्साका
रेखाहरू मेटिए पनि
पुर्खाको रगतले
कोरिएको देशको नक्सा
नेपाली मनबाट मेटिएको छैन ।
आधुनिक हतियार नभए
पनि
आँखामा मातृभूमिको
तस्बिर
प्रतिविम्बित भएर
झल्केको छ
त्यही तस्बिर नै
सीमा मिच्नेलाई
ठिङ्ङ उभिएर चुनौती
दिएको छ ।
छिमेकीको औँलाले परपर सिमाना देखाउँदा
नेपालीको छाती चसक्क दुख्छ
इतिहास साक्षी छ
झुक्न सिकेनौँ हामीले ।
पहरा दिने सिपाही मात्र होइनन्
आपतविपद्
सिङ्गो देश पहरेदार बन्ने गर्छ
न्याय र स्वाभिमानको लडाइँमा
नेपाली मन ढाल बनेर उभिने गर्छ ।