मेरो पनि घोषणापत्र छ (१)
म मतदाता मात्र हुँ तर
मेरो पनि घोषणापत्र छ !
खन्ती लुकाएर साधुभेषमा आएका चोरहरूलाई भोट नदिने
कण्ठमा विष राखेर वाणीभेषमा आएका सुमधुर स्वरहरूलाई भोट नदिने ।
गनाएका फोहोरहरूलाई भोट नदिने
हाम्रै खल्ती काटेर हामीलाई नै
किन्न आएका मोहरहरूलाई भोट नदिने ।
सिङ्गै देशलाई पन्छाएर
आफ्नै स्वार्थमा जुट्नेहरूलाई भोट नदिने ।
एउटा पुल बनाउँदा
दुइटा पुल लुट्नेहरूलाई भोट नदिने ।
आफैँ हलो अड्काएर
गोरु कुट्नेहरूलाई भोट नदिने ।
रातदिन उधारो सपना बाँडेर
दिमाग फुट्नेहरूलाई भोट नदिने।
आज पनि म भोको छु…
मेरै छाक काट्नेहरूलाई भोट नदिने ।
जे भने पनि पत्याउनु मेरो पनि गल्ती हो
गीता छोएर सधैँ ढाँट्नेहरूलाई भोट नदिने ।
मेरो पनि घोषणापत्र छ (२)
जसको शिरमा देश छ
हृदयमा भगवान् छ
र वाणीमा अमृत छ
म उसलाई भोट दिन्छु ।
जसको कर्ममा निष्ठा छ
जसको विश्वासमा भरोसा छ
र जसको सपनामा समृद्धि छ
म उसलाई भोट दिन्छु ।
जसको रगतमा छहरा छ
जसको छातीमा पहरा छ
र सत्य जसको सहारा छ
म उसलाई भोट दिन्छु ।
जसले सम्भावनाको बाटो देखाउँछ
पसिना रोप्ने उर्वर माटो देखाउँछ
र म रोएको आँसु
जसले आफ्नो आँखामा देखाउँछ
म उसलाई भोट दिन्छु ।