१.
सूर्यको आभालाई खिचेर
अन्नमा ब्रह्म निर्माण गर्ने
वायु पान र सोधन गर्दै
तिमीलाई प्राण दान गर्ने
धराको बललाई बदलेर
तिमीलाई वीर्यवान् बनाउने
माटो, बुटो, वायु र तेज…
तिमीलाई पिलाउने को होला ?
२.
कयौँ पटक…
प्रजन्यका लागि
चोखो पानीको खाँचो देखाउँदै,
गरुँगो पानी पिएर…
हलुका पानी दिने यज्ञ लाएकै हो ।
तिम्रो आरोग्यताका लागि
बुटी र ओखती बनेर
धुरी, धारा र गिरीहरूमा
दिव्य विस्कुन फिँजाएकै हो ।
३.
तिम्रो ऋतुचक्रलाई जोगाउन
मेरै वसन्त सुम्पिएकै हो ।
तिम्रा तृष्णा र प्रेमल कुण्ठाको सम्बोधन गर्न
मेरै अंशहरूले बलिदान गरेकै हो ।
वसुधाका अंश हामी…
आपसी कुटुम्ब पनि हौँ ।
कुटुम्ब जोगाउँदा म पनि जोगिन्छु कि भन्ने
त्यसैले युगान्तर आश लाएकै हो ।
४.
तिमी जोगिँदा मलाई मज्जा आउँछ
म जोगिँदा तिमीलाई ऊर्जा आउँछ ।
तिम्रो निरन्तरताका लागि म जोगिनुपर्छ ।
मेरो निरन्तरताका लागि…
तिमीले के कर्म गर्न सक्छौ ?
धेरै केही चाहिँदैन
मात्र…
भएको चाहिँ सपार्ने र बीज अंशलाई नबिगारे हुन्छ
जात र गुण मेटिने गरी वर्णसङ्कर नगरे हुन्छ ।।