यो चोकमा बसेर
बुद्ध आज शोकमा छ ।
यो वर, त्यो पर, परको घर
यो गाउँ, त्यो ठाउँ अनि सहर
शान्तिको कान्तिमा जताततै तुवाँलो झरेको छ
बुद्धको नाममाथि घोर कलङ्क पोतिएको छ ।
यो चोकमा बसेर
बुद्ध आज शोकमा छ ।
न सत्य, न धर्म, न लाज
न इमान, न विश्वासको आवाज
मानवताको बस्तीमा सलह पसेको छ
स्वार्थको भेलले हरेक किनार बगाएको छ ।
यो चोकमा बसेर
बुद्ध आज शोकमा छ ।
शान्तिको नाममा यहाँ गोली पड्कन्छ
शहादत ओढेर सडक निःशब्द निदाउँछ ।
अपराधका पाइला अचेल नाङ्गै हिँड्छन्
कानुनका अनुहार सिक्काले ढाकिन्छन् ।
यो चोकमा बसेर
बुद्ध आज शोकमा छ ।
समाचारका अक्षरमा मूल्यको ट्याग झुन्डिएको छ
गोप्य फाइलहरूभित्र सत्य थुनिएको छ
सपना बेच्नेहरू आज सेवक कहलिएका छन्
माटो बोल्नेहरू द्रोही ठहरिएका छन् ।
यो चोकमा बसेर
बुद्ध आज शोकमा छ ।
यो चोकमा बसेर
बुद्ध आज साँच्चै शोकमा छ ।
किनकि
बुद्धको सपनाले
बोधीवृक्षको फेदमुनि आत्मदाह गरेको छ ।