दिनभर टुप्पीबाट पसिना पैतालासम्म
पुर्याएर
तनक्क तन्कनेहरू
ओछ्यान नजिकको जुटको बोरामा टेकेर
पैताला
रनक्क रन्किरहेका हुन्थे ।
तन्कनेहरू, थन्कन पर्नेहरूका सामु
भाषणमा तन्किए
आश्वासनमा तन्किए
शिलान्यासमा तन्किए
मदिरालयमा तन्किए
शौचालयमा तन्किए ।
बिचौलियाका सामु तन्किए
मिचौलियाका सामु तन्किए ।
तन्किँदा तन्किँदा बुटको चाक
खिइसक्दा पनि
तन्कन नछुटेकाहरू
खुम्चिएर — परिवारको बाध्यताले
बोकेर — हरियो राहदानी
देखिन्छन् — देशको झण्डा बोकेर उभिइरहेका
एयरपोर्टमा
तिनको तन्काइ अलि बेग्लै लाग्थ्यो
सावाँको ठूलो मुठोले होइन
मान्छेहरू
ब्याजको सिर्कनोबाट उम्किन
तन्काउँदै थिए एकजोर थकित पैताला ।