देशले खोजिरहेछ आज शालीनता
अहंकार र घमण्डले हराइदिन्छ मानवता ।
दम्भ र भाषणले छोप्छन् सधैँ काम
खराब नियत लुकाइदिन्छन् खाली ठूला नाम ।
अन्यायको अन्धकारले दब्छ यहाँ न्याय
विभाजन फैलाउँछ द्वेष, मर्छ एकताको माया ।
हिंसा फैलँदा भत्किन्छ जीवनको शान्ति
न्याय उज्यालिँदा फेरि फर्कन्छ देशमा कान्ति ।
आऊ घमण्ड छोडेर अपनाऔँ नयाँ विनम्रता
अहंकार हटाएर फिर्ता ल्याऔँ हराएको मानवता ।
शब्द होइन, कामले निर्माण गरौँ नयाँ राष्ट्रियता
न्याय, शान्ति र सद्भावले सजाऔँ हाम्रो एकता ।
विकृतिका भुमरी तोडी बनाऔँ साँचो शील
आफ्नै कमजोरी सुधार्दै रोपौँ उज्यालो दिल ।
छलकपट हटेपछि फुल्छ मनको वसन्त
सत्य र करुणाले बन्छ देश अझ उन्नत ।
भाइचारा र सद्भावले खुल्छ नयाँ मार्ग
अन्धकार हट्छ जब सहमतिले भरिन्छ संवाद ।
उमेर, जात, भाषा नसोची समाऔँ हातमा हात
एकताको सुगन्धले फुलाउँछ देशको प्रात ।