घरबाहिर तामझाम छ
घरभित्र हरे ! राम छ
पढेलेखेको छ
अन्तर्हृदयमा केही नदेखेपछि
बेकाम छ
भित्र नै कामैकाम छ
र पनि
विमानस्थलमा जाम छ
थाहा छैन जानेहरूलाई— आफ्नै
हृदयस्थलमा काम छ ।
अमेरिकाले अवसर दिँदा
चीनले चमत्कार दिँदा
भारतले भरोसा दिँदा
खाडीले खन्याउँदा
अनि युरोपले युगान्तकारी परिवर्तन दिँदा
एसियाले एकताको ऐना देखाउनुपर्छ
नेपालले नवप्रवर्तनको नसालु आरम्भ देखाउनुपर्छ ।
हरे ! राम पनि घरभित्र
हरेक काम पनि घरभित्र
चित्र र चरित्र पनि घरभित्र निर्माण गरेर
प्राचीनतामा आधुनिकता ल्याएर
गोबरलाई गणेश बनाएर
निर्यात गर्नुछ आविष्कार
पैठारीमा प्रेम पनि ल्याउनु छ
क्लेस, द्वन्द्व र दरारलाई
करारमा राखेर न्यूनीकरण गर्दा
प्रेम र परेवाले
शान्ति ल्याउनुपर्छ ।
तडकभडकमय सडकको तामझाम
देखावटी दृश्यमा नाटक हो
नियमको नृत्य होइन
कर्मको कृत्य होइन
केवल आफ्नोपनको आभास
आफैँ भित्र हुनुपर्छ
पवित्र हुनुपर्छ ।
“चोर माइन्डेड”को दुनियाँमा सफलता देखिए पनि
“कमजोर माइन्डेड”को जीवनमा
जीवन्तता हुन्छ
कामचोर हुँदैन कमजोर मान्छे ।
ज्ञात रहोस्
कामचोर नहुनु नै अथाह धनी हुनु हो
त्यसैले
अस्ट्रेलियादेखि अफ्रिकाभन्दा पनि पर
आफैँभित्र खोजी गर्नुपर्छ आफैँ ।