उसले पानीमा प्राण देख्यो
वायुमा आयु देख्यो
र वनमा जीवन भेट्यो
मैले पानीमा जवानी देखेँ
वायुमा वासना देखेँ
र जङ्गलमा मङ्गल भेटेँ ।
यही कारण
ऊ नारायण बन्दै गयो
म नारद बन्दै गएँ
यो जुनी यस्तै भयो ।
ऊ नम्बरको पछाडि लागेन
अमरको पछाडि लाग्यो
म पनि नम्बरको पछाडि लागिनँ
तर कम्मरको पछाडि लागेँ ।
ऊ अमर खोज्दै आयो, पायो र गयो
मैले अमरलाई अमर ठानिनँ
यो जुनी यस्तै भयो ।
उसले प्रयोगमा योग देख्यो
अध्ययनमा ध्यान भेट्यो
त्यसैगरी तनमा तन्त्र देख्यो
मनमा मन्त्र भेट्यो
र साधना गर्न थाल्यो ।
मैले तनमा शोक देखेँ
मनमा अतृप्त भोक भेटेँ
र बिलौना गर्न थालेँ ।
यही कारण
ऊ बुद्ध बन्दै गयो, म बुद्धू बन्दै गएँ
यो जुनी यस्तै भयो।
ऊ गुरु खोज्दै आयो
चिन्दै गयो, जान्दै गयो
पुज्दै गयो, बिस्तारै बुझ्दै गयो ।
म पनि गुरु खोज्दै हिँडेँ, छान्दै हिँडेँ
पुज्दै हिँडेँ, मान्दै हिँडेँ
मान्दामान्दै, पुज्दापुज्दै
मैले त गुरु बुझ्नै बिर्सेछु !
यही कारण म पत्थर बन्दै गएँ
ऊ शालिग्राम बन्दै गयो
यो जुनी यस्तै भयो ।
उसले मगन्तेलाई पनि मगन्ते देखेन
बरु सन्त देख्यो
मैले सन्तलाई पनि मगन्ते देखेँ ।
उसले बाँदरलाई पनि बाँदर देखेन
बरु हनुमान देख्यो
मैले हनुमानलाई पनि बाँदर देखेँ ।
ऊ राम खोज्दै आयो, पायो र गयो
म रामको देशमा जन्मेँ, तर रावण भएर बाँचेँ
यो जुनी यस्तै भयो ।