कविता : यसपटक उनीहरू

सामाजिक सञ्जाल र टिकटकहरू

मन बिसाउने चौतारो बनिदिएपछि

विदेसिएका आफ्नै सन्तानहरूले

‘बा-आमा अब आँखा खोल्नुस्’ भनिदिएपछि

सत्तासीन पुराना मठाधीशहरू

पटक-पटक नराम्ररी चिप्लिएपछि

नयाँ परिवर्तनका अग्निज्वालाहरू

दन्दन्ती देशैभरि दन्किएपछि

आफ्ना मनहरू परिवर्तन गरे

यसपटक उनीहरूले ।

वर्षौँसम्म चरम निराशा सँगालेर

असन्तुष्टिका अग्ला पहाडहरू उचालेर

सुखद भविष्यको चाहनाले निथ्रुक्क भिज्दै

आशाको नौलो बिहानी झुल्किने लालसामा

बजाएर घण्ट आफ्नै मन-मन्दिरमा

मनलाग्दी चिन्हमा निर्धक्क भोट गरे

यसपटक उनीहरूले ।