कहिलेकहीँ यस्तो लाग्छ
जहाँ मेरो एक मुठ्ठी माटो छैन
त्यहीँ उभिएर - किन सिङ्गै देश
"मेरो हो" भन्ने साहस हुन्छ ?
मलाई बिल्कुल थाहा छैन - "तर हुन्छ"।
पहाड पहिरोमा झर्दा होस्
या तराई डुबानमा पर्दा
किन मलाई छटपटी र पीडा हुन्छ ?
त्यो पनि थाहा छैन - "तर हुन्छ" ।
कुलदेउताले - मेरो पुर्खाको पनि
सालनाल यही माटोमा झरेको भन्छ
मर्दा पनि यतै कतै
वनपाखा र बगरमा मरेको भन्छ
तर थाहा छैन कर्म हरेर हो कि
भाग्य टरेर हो - आजभोलि
भन्नेले मलाई बास हराएको चरा
र साथ हराएको बरा भन्छ - "तर भन्छ" ।
हुन पनि आज -
म त्यही चरा जस्तै भएको छु ।