सुकिला दौरा–सुरुवाल लगाएर शपथ खाए पनि
इज्जत र प्रतिष्ठा धमिलो बनाएको देखेको छु ।
शिर ठाडो बनाएर शपथ खाए पनि
नाकै काटेर हिँडेको देखेको छु ।
ईश्वरको नाममा शपथ लिए पनि
मनमा हरि नभएको देखेको छु ।
मान्छेलाई साक्षी राखेर शपथ खाए पनि
मान्छेलाई मान्छे नै नगनेको देखेको छु ।
राष्ट्रको नाममा शपथ लिए पनि
देशै बेच्न खोजेको देखेको छु ।
जनताको नाममा शपथ लिए पनि
दुःखीलाई धरधरी रुवाएको देखेको छु ।
सदाचारको प्रतिज्ञा हो भनेको सुनेको थिएँ
शपथ ढोँग र भोगको कर्मकाण्ड भएको देखेको छु ।
शब्दमा शक्ति हुन्छ भन्ने सुनेको थिएँ
शपथ फगत सुगा–रटाइ भएको देखेको छु ।
हिजोका शपथ मसीले लेखिएका थिए
आज तिम्रो शपथ रगतले लेखिएको छ ।
सहिदलाई सम्झेर खाएको कसम
भोलि यसै खेर नजाओस् भन्ने ठानेको छु ।
इतिहास फेरिने चिज हो भन्ने बुझेको छु
हिजो र आज एउटै होइन भन्ने जानेको छु ।
खै, कस्तो शपथ खाएका छौ तिमीले
आँखा नझिम्क्याई हेरेर बसेको छु ।