पहिलोचोटि अनलाइनको दुनियाँमा
साहित्यको दीप बाल्ने साहस
कुनै व्यापार थिएन
केवल शब्दको विश्वास लिएर
केही युवाहरू अघि बढे
तिनका सपना जति कोमल
दृढता त्यति नै कठोर थियो ।
समाजले सोधिरहन्थ्यो
“के टिक्ला ?”
समय कठोर भएर उभिएथ्यो
“के निरन्तरता पाउला ?”
तर उनीहरूले उत्तर दिनुभन्दा
केवल लेखिरहे, हिँडिरहे
मौनता भित्रभित्रै आवाज बनेर ।
मानिसहरू किन पछि हट्छन् ?
सायद असफलताको डरले
सायद साथ छुट्ने चिन्ताले त होला
तर साहित्यपोष्ट !
परिवारको माया शब्दमा बाँच्यो
साथीहरूको धड्कन हौसलाले सजायो
“हामी छौँ नि”
यही वाक्यले थामिरह्यो यो यात्रालाई ।
पक्कै कयौँ रातहरू निद्राबिना बिते होलान्
केही आलोचना चुपचाप सहे होलान्
तर ती साहसी युवाहरूको दृढता
कहिल्यै न त कमजोर भयो, न रोकियो
किनकि उनीहरूमा चेत थियो
सपना देख्नु र सँगै
सपना निभाउनु नै असलमा यात्रा हो ।
आज छ वर्षको उज्यालो बोकेर
त्यही यात्राले उत्सव मनाइरहेको छ
हरेक शब्दमा पसिना मिसिएको यात्रा
हरेक कथामा विश्वास झल्किरहेछ ।
साहित्यपोष्ट !
तिमी केवल एउटा प्लेटफर्म मात्र होइनौ
तिमी त भावना हौ, तिमी त हिम्मत हौ
तिमी त ती सबै अपूरा इच्छाहरूको
पूरा हुने एक अद्भुत बाटो हौ ।
साहित्यपोष्ट ! तिमीले
शङ्काहरू पार गर्यौ
आफ्ना कामनाहरू पूरा गर्यौ
टिमका चाहनाहरूलाई एक स्वर दियौ
र पो आज पनि उस्तै जोसमा अघि बढिरहेछौ ।
यस शुभ अवसरमा
साहित्यपोष्टलाई
हजारौँ शब्दको आशीर्वाद
लाखौँ पाठकको माया
र अनन्त यात्राको मुरीमुरी कामना ।
अन्तमा फेरि, साहित्यपोष्ट !
तिमीलाई जन्मदिनको हार्दिक शुभकामना ।