ए !
आफूलाई चेतनशील प्राणी दाबी गर्ने मान्छेहरू हो !
तिमीहरूले फालेको कार्बन डाइअक्साइड लिने
तिमीहरूलाई अत्यावश्यक अक्सिजन दान दिने
तिमीहरूको पँधेरोमा पानीको अनिकाल
लाग्न नदिन लागिपर्ने र तिमीहरूको गाउँमा
मूर्ख पहिरोको वितण्डा नियन्त्रण गर्न अघि सर्ने
हामी नै हौँ भन्ने कुरा थाहा छ कि छैन ?
अराजक घामपानी र हिंस्रक हुरीबतासको आक्रमणबाट
तिमीहरूलाई बचाउने घर ठड्याउने काठपात
तिमीहरूको भोको पेटलाई खुसी पार्न भात तिहुन पकाउँदै
प्राण त्याग्ने दाउरा
तिमीहरूलाई स्वस्थ राख्न सहयोग पुर्याउने
दूध दिने गाईभैँसी र तिमीहरूको खेतबारीमा
दिनभरि मेहनत गर्ने हलगोरुको खान्की
तिमीहरूको ख्याउटे बालीनालीहरूलाई हृष्टपुष्ट बनाउने
मल बन्न तत्पर पतकर
तिमीहरूको उकालीको सहारा लौरो आदि
कहाँबाट आउँथ्यो, हामी नभए !?
ए !
स्वघोषित बुद्धिजीवी मान्छेहरू हो !
एकफेर छातीमा हात राखेर सोचेर हेर
हामी नहुने हो भने के होला तिमीहरूको हाल !?
ए ! आफूलाई सर्वश्रेष्ठ प्राणी ठान्ने मान्छेहरू हो !
तिमीहरूले त हाम्रा शाखासन्तानहरूलाई फैलाएर
सारा नाङ्गा पाखापखेराहरूको आङ ढाकिदिनुपर्ने होइन र !?
तर सौतालाई भन्दा पल्लो छेउको
र संसारकै सबैभन्दा तल्लो खालको व्यवहार गरी
समृद्धिको सुन्दर नारा लाउँदै
विकासको मीठो गीत गाउँदै गरिरहेका छौ
निर्ममतापूर्वक हाम्रो हत्या ।
कि ख्याल गरेका छैनौ
तिमीहरूको क्रियाकलापले तरवार बनेर
तिमीहरूलाई नै मार हानिरहेको कुरा ?
ए !
आफूलाई दूरदर्शी मान्ने मान्छेहरू हो !
आफ्नो जिन्दगी र सन्तानको भविष्यको चिन्ता छ भने
बेलैमा खोल तिमीहरूको मस्तिष्कमा लागेको ताल्चा ।