रातमा बत्ती नबाल्नू कसैले
दिउँसो पनि लगाएर बस्नू पर्दा
आँखामा हरघडी लगाउनु बाक्लो कालो सुर्मा
निस्कनै परेमा बाहिर
लगाएर निस्कनू निख्खर कालो चस्मा ।
नहाँस्नू, हाँस्दा पनि
ऊर्जा खपत हुन्छ
तिम्रो आँसुले पनि सोस्छ
बहुमूल्य सूर्य–किरण ।
राजधानीको तापक्रम सहन नसकेर
महाराज सुतिबक्सिएको छ
आफ्नो वातानुकूलित शयनकक्षमा
यो घडीमा मारिदिएका छौँ
सहरका सारा स्ट्रिट ल्याम्पहरू ।
निद्रा बिथोल्ने गरी मौसुफको
हल्ला नगर्नू कसैले
फेरि सन्तुलन बिग्रन सक्छ राजधानीको
रातमा बत्ती नबाल्नू कसैले ।
टिप्पणीहरू
अहिले कुनै टिप्पणी छैन। पहिलो टिप्पणी तपाईं नै गर्नुहोस्।