त्यो कथा कस्तो थियो ?
शोक, भोक, रोग र अभाव
उत्पीडन, जिम्मेवारी र यथार्थता
त्यही कथा कस्तो थियो ?
निरीह अनाथ सरहकी बालिका
वेदनाका छटपटी र रहरसँगै
जन्मे–हुर्केपछिका बर्बरता र क्रूरता
सुनेको कथा कस्तो थियो ?
सुन्नेले अपत्यारिलो कथा सुने
उसले भोगी, उसैले देखी
समाजको ममता र समाजको निर्ममता
देखेको कथा कस्तो थियो ?
पात्र एक, भोगाइ अनेक
छोरीको हक र स्नेह खोज्दा–खोज्दै
पत्नी, बुहारी, आमा र कर्मचारीतन्त्र
कथा उसैको निधारको थियो ।
चर्केका कर्मरेखा टाल्दै हिँड्दा
ऊभित्रका पात्रहरू ढलेका थिए
उठेर हिँड्ने हिम्मत र व्यग्रता
कथा उसको पुर्पुरोको थियो ।
भन्नुस् न महोदय, म सुन्छु
तपाईँको पुर्पुरोको कथा कस्तो थियो ?