नयाँ वर्ष
क्यालेन्डरको पाना फेर्ने दिन मात्र होइन
मन–वचनको धुलो पुछ्ने दिन बनोस् ।
हिजो केही योजना बने
केही सपनाले आँखा खोले
कतिले समयसँग हात मिलाए
कति अधुरोपनमै मनको कुनामा बसाइ सरे ।
केही नयाँ मानिस भेटिए
हाँसो बोकेका, आशा साट्ने
र केहीले निराशालाई जीवनकै पाठ बनाइदिए ।
कुनै उपलब्धि गर्व बनेर उभियो
कुनै असफलता नम्रताको ऐना बन्यो ।
कोही बाटोमै छुटे, कोही मोडमै हराए
कोही समयसँग हारेर स्मृतिमै सीमित भए।
हामी हिँडिरह्यौँ— फेरिँदो मौसम जस्तै,
फेरिँदो सोच जस्तै, आफूलाई खोज्दै
कहिलेकाहीँ आफूबाटै भाग्दै ।
नयाँ वर्ष, हिजोका गल्तीहरू दोष होइनन्
आजका पाठ हुन् भन्ने बोध लिएर आओस् ।
घाउहरू पीडाका कारण होइन
नयाँ दिन बलियो बनाउने साहस बनून् ।
नयाँ वर्ष, नयाँ कपडा जस्तै नबनोस्
नयाँ सोच जस्तै मनमा बसोस् ।
जहाँ कम बोल्नेले धेरै बुझोस्
धेरै बोल्नेले पहिले सोचोस् ।
नयाँ वर्ष, अरूलाई जित्ने होड होइन
आफूलाई जित्ने संयम लिएर आओस्।
र अन्त्यमा, नयाँ वर्ष नयाँ बनेर आओस्
नयाँ वर्ष २०२६ को मंगलमय शुभकामना।