झर्ला र खाऊँला
म पनि केही पाऊँला
दसैँ मनाऊँला
भन्ने आशामा बसेका हुँडार, स्याल र ब्वाँसाहरू
सिंहको छाला ओढ्ने प्रयास गर्दै
आज चलमलाएका छन्
जब तिनका अवैध सन्ततिमा कानुनको लट्ठी बज्रियो
आफ्नो क्षमतामा भरोसा नहुनेहरू
दयाको भिख माग्दै दौडेका छन्
तिनै आफ्ना अप्राकृतिक पुर्खाको घरदैलोमा ।
जस्केलाबाट छिरेका नायक र
अवैध सन्ततिको मोहले ग्रसित असुरहरू
सन्ततिको रक्षा गर्ने झुटो कसम खाँदै
आसुरी शक्तिको वरदान पाएर
आफूलाई समाज सञ्चालनका ठेकेदार ठानेका छन्
र राक्षसी अट्टहास गर्दै
विरासत जोगाउँछौ भन्ने नारासहित
भव्य धरोहरको आँगनमा भेला भएका छन् ।
आफ्नो अक्षमताले भुत्ते भएको
घृणाको गैँतीले जगमा प्रहार गर्दैछन्
जस्केलाका नायक
अप्राकृतिक राक्षसी पुर्खा र तिनका अवैध सन्तान
देखाउँदै गुण्डाराज र आसुरी अट्टहाससहितको
नाङ्गो नाच ।
गर्नेलाई भन्दा देख्नेलाई लाज भनेझैँ
विधान उत्तानो पल्टेको छ
नियम च्यातिएका छन्
कानून मूकदर्शक बनेको छ
धरोहरका लाचार पहरेदारहरू
बन्दकोठामा निस्सासिएका छन्
र राक्षसी नाङ्गो नाच हेर्न बाध्य छन्
मसिहाको पर्खाइमा ।