जित्नेहरू पनि मूर्छामा छन्
हार्नेहरू पनि मूर्छामा छन्
कोही धेरै बोलेको सुनेरै मूर्छामा छन्
कोही बोली सुन्नै नपाएर मूर्छामा छन् ।
आजकल अरू काम छैन
किनकि यो पाला जित्ने र हार्ने भइसक्यो ।
वायुमण्डलमा आवाज छ
‘सुध्रिनुपर्छ नत्र सकिन्छ !’
हार्नेहरू भन्छन् ‘सुध्रिनलाई बिग्रेको हो र ?
हारेको हो, फेरि उठिन्छ, फेरि जितिन्छ ।’
उठ्नै लागेका केही मनहरू
यही सुनेर फेरि मूर्छित छन् ।
गल्ती नदोहोर्याउन, जितमा मइमत्त नहुन, इशारामा ननाच्न
घरधुरीबाट खबरदारी सन्देश छ
नियुक्ति, मुद्दाहरू र बिरामी पढेर
खबरदारी सन्देशहरू मूर्छित छन् ।
यसो हेर्छु देशै मूर्छामा छ
यहाँ कि त जित्ने छ, कि त हार्ने !
चोकमा सुन्छु
अक्षर लेख्नेहरू
नबिकेर, नपढिएर मूर्छामा छन्
अक्षर छाद्नेहरू
बढी बिकेर, दङ्ग परी मूर्छामा छन् ।
कोही घर बेचेको पैसा
विदेश छोरोलाई पठाउन नसकेर मूर्छामा छन्
कोही जीवनभर हाड घोटेर पनि
झुप्रो बनाउन नसकेर मूर्छामा छन् ।
कोही पिआर र भिसा नबनेर
कोही बाकसमा आफ्ना सन्तति देखेर मूर्छामा छन् ।
पढाइ, औषधिमुलो र एक सरो धरो दिन नसकेर पनि मूर्छामा छन्
कोही ओभरवेट मिलाउन नसकेर मूर्छामा
बलात्कारीहरू सुरक्षित भएर खुसीले नाचेर मूर्छामा छन्
पीडित परिवारहरू आँसु सुकेर मूर्छामा छन्।
यसो हेर्छु देशै मूर्छामा छ
यहाँ कि त पीडक छ, कि त पीडित !