मित्र
नाम होइन,
आवश्यकताको क्षणमा
आवाज बनेर आइपुग्ने अनुभूति हो ।
भीडले घेरेको बेला
एक्लोपन बुझ्ने आँखा
हाँसाेभित्र लुकेको
आँसु पढ्न सक्ने मन
त्यही हो, मित्र ।
मित्र
सधैँ सहमत हुँदैन
तर असहमत हुँदा पनि
छोडेर जाँदैन
कटु सत्यलाई
मायाको स्वरमा भन्न सक्ने
दुर्लभ साहस हो ।
सफलतामा ताली बजाउने धेरै हुन्छन्
असफलतामा
छेउमा बसेर
चुपचाप हात थाम्ने
थोरै मात्र
तिनै हुन्, मित्र ।
मित्र
रगतको नाता नभए पनि
भाग्यले रोजेको
आत्माको सम्बन्ध हो
जहाँ हिसाब छैन
केवल भरोसा हुन्छ ।
समय बदलिन्छ
मान्छे बदलिन्छन्
तर
एक साँचो मित्र
समयसँग होइन
सत्यसँग उभिन्छ ।
मित्र
जीवनको यात्रामा
नक्सा होइन
अन्धकारमा
बालेको सानो दीप हो
जसको उज्यालो
आफैँभन्दा अगाडि
मलाई देखिन्छ ।